Intymnaje videa zasnavalnicy startapa, źniataje bieź jaje zhody, trapiła ŭ internet. Joj spatrebiłasia try hady, kab usio vydalić

Historyja Bryz Lu, jakaja zrabiła jaje viadomaj na ŭvieś śviet i nazaŭsiody źmianiła jaje žyćcio, pačałasia sa zvyčajnaha telefonnaha zvanka ŭ pačatku 2020 hoda. Tady adnakurśnik dziaŭčyny paviedamiŭ joj, što intymnaje videa, źniataje bieź jaje zhody, kali joj było 17 hadoŭ, trapiła na płatformu PornHub pad nazvaj «Karejski padletak».

Videa nie tolki chutka raspaŭsiudziłasia, ale i stała asnovaj dla stvareńnia zvyš 400 dypfejkaŭ, jakija zapoŭnili internet. Nastupstvy dla Lu byli katastrafičnymi: jana sutyknułasia z depresijaj i navat sprobaj samahubstva, raspaviadaje vydańnie Wired.

Kab vydalić ź sieciva ŭsie štučnyja intymnyja materyjały, Lu spatrebiłasia bolš za try hady. Jana źviartałasia da palicyi Bierkli (štat Kalifornija, ZŠA), roznych arhanizacyj pa abaronie pravoŭ čałavieka (u tym liku ŭ jeŭrapiejskija), pisała ŭ słužby padtrymki samich internet-płatformaŭ, dzie byli zaŭvažanyja jaje dypfejki.

Ale heta nie dało istotnych vynikaŭ, bo bolšaść viedamstvaŭ i arhanizacyj admaŭlalisia dapamahać. Adny kazali Lu, što dokazy pravaparušeńnia ŭ adnosinach da dziaŭčyny źjaŭlajucca niedastatkovymi. A druhija adznačali, što «prahladać materyjały ź niepaŭnaletnimi zabaroniena zakonam, bo dziaŭčynie na momant zdymki pieršaha intymnaha videafajła było 17 hadoŭ».

«Jakaja roźnica, ci było mnie 17 albo 18? Reč ža ŭ pryčynienaj mnie škodzie», — aburałasia ŭ adkaz Bryz Lu.

Dziaŭčyna nie stała zdavacca i ŭ svaich namahańniach dajšła da taho, što stvaryła ŭłasny startap Alecto AI, kab dapamahać ludziam, jakija trapili ŭ takuju ž situacyju. Startap raspracoŭvaje instrumienty na asnovie sistem raspaznańnia tvaraŭ, jakija dapamahajuć znachodzić i vydalać ź internetu vyjavy, raźmieščanyja biez zhody.

Dziakujučy supracoŭnictvu ź inšymi arhanizacyjami pa dapamozie achviaram kibierhvałtu, Lu i jaje kamanda ŭ 2023 hodzie zmahli vyjavić 832 spasyłki, jakija źmiaščajuć intymnyja dypfejki ź dziaŭčynaj. Jany źviarnulisia da chostynh-pravajdaraŭ, značnaja kolkaść spasyłak i materyjałaŭ byli vydalenyja, ale viadomyja technahihanty, asabliva karparacyja Microsoft, supraciŭlalisia i ihnaravali zvaroty Bryz Lu, bo dokazy pravaparušeńnia ŭ adnosinach da dziaŭčyny ličyli niedastatkovymi, piša Wired.

Zmahańnie Bryz Lu z Microsoft, pavodle vydańnia, ciahnułasia 8 miesiacaŭ i bolšaść času karparacyja ihnaravała dziaŭčynu i admaŭlałasia vydalać kala 150 spasyłak na intymnyja materyjały. 

Praryŭ u pytańni ŭźnik tolki paśla taho, jak dziaŭčyna damahłasia sustrečy ź Liz Tomas, kiraŭnicaj pa kibierbiaśpiecy Microsoft. Paśla hetaha amal adrazu byli vydalenyja 142 spasyłki na dypfejki. 

Hetaja historyja pasłužyła pryčynaj taho, što karparacyja Microsoft u śniežni 2024 hoda publična padtrymała zakonaprajekt Kanhresa ZŠA pra abaviazkovaje vydaleńnie intymnaha kantentu za 48 hadzin paśla zvarotu paciarpiełych ź pierśpiektyvaj štrafaŭ dla płatformaŭ da $50 000.

«Heta vialiki krok napierad, ale hłabalnyja praviły treba źmianiać, bo daloka nie ŭsie kampanii i płatformy reahujuć chutka, što pryčyniaje bol i pakuty paciarpiełym.

Kali chtości vam kaža, što vy nie možacie złamać sistemu — nie viercie. Heta ciažka, ale nie niemahčyma», — padsumoŭvaje Bryz Lu.

• 33
• 0
• 2
• 1
• 0
• 1
• 0
• 2