Pra što damovilisia na samicie ŭ Łondanie pa Ukrainie?
«My nie možam pahadzicca na takija słabyja pahadnieńni, jak minskija, jakija Rasija moža ź lohkaściu parušyć», — skazaŭ brytanski premjer.
Premjer-ministr Vialikabrytanii Kir Starmier na pres-kanfierencyi pa vynikach samitu jeŭrapiejskich lidaraŭ pa Ukrainie ŭ Łondanie zajaviŭ, što Vialikabrytanija vydzielić Ukrainie 1,6 miljarda funtaŭ (1,94 miljarda jeŭra) dla pakupki bolš za piać tysiač rakiet SPA. Jany buduć vyrableny ŭ Biełfaście (Paŭnočnaja Irłandyja), pieradaje The Guardian.
«Heta budzie mieć žyćciova važnaje značeńnie dla abarony krytyčna važnaj infrastruktury ciapier i ŭmacuje Ukrainu ŭ zabieśpiačeńni miru, kali jon nastupić, tamu što my pavinny vučycca na pamyłkach minułaha. My nie možam pahadzicca na takija słabyja pahadnieńni, jak minskija, jakija Rasija moža ź lohkaściu parušyć», — skazaŭ jon.
Starmier adznačyŭ, što va Ukrainu hatovy adpravić miratvorcaŭ i samaloty, kab abaranić vykanańnie mirnaha pahadnieńnia
Jaho spytali, ci moža jon vyklučyć kanflikt pamiž Vialikabrytanijaj i Rasijaj.
«Ja nie chaču kanfliktu va Ukrainie, u Jeŭropie i, viadoma, u Złučanym Karaleŭstvie. Ja chaču stabilnaści ŭ Złučanym Karaleŭstvie.
Kab zabiaśpiečyć hetuju stabilnaść, treba być upeŭnienymi, što my zmožam abaranić pahadnieńnie va Ukrainie, tamu što naša historyja vučyć nas tamu, što kali ŭ Jeŭropie ŭźniknie kanflikt, jon pryjdzie i da našych bierahoŭ», — adkazaŭ brytanski premjer.
Jon nie pahadziŭsia, što ZŠA zaraz «nienadziejny sajuźnik». «Jany byli nadziejnym sajuźnikam na praciahu mnohich dziesiacihodździaŭ i praciahvajuć im zastavacca».
Adkazvajučy na pytańnie pra reakcyju ZŠA na toje, što jon prapanuje, Starmier namiaknuŭ, što jon abmiarkoŭvaŭ heta z Trampam padčas ich učorašniaj telefonnaj razmovy.
Starmier adznačyŭ, što na samicie ŭ Łondanie ŭzhadnili čatyry važnyja kroki:
- Praciahvać akazvać Ukrainie vajennuju dapamohu, pakul idzie vajna, i ŭzmacnić ekanamičny cisk na Rasiju.
- Luby tryvały mir pavinien zabiaśpiečyć suvierenitet i biaśpieku Ukrainy, i Ukraina pavinna być za stałom pieramoŭ.
- U vypadku zaklučeńnia mirnaha pahadnieńnia jeŭrapiejskija lidary buduć imknucca praduchilić luboje ŭvarvańnie Rasii va Ukrainu ŭ budučyni.
- Budzie stvorana «kaalicyja achvotnych» dla abarony Ukrainy i zabieśpiačeńnia miru ŭ krainie.
Kiraŭnica Jeŭrakamisii Ursuła fon der Lajen zajaviła, što ciapier vielmi važna pavialičyć vydatki na abaronu.
«Važna padrychtavacca da horšaha».
-
Kamandujučy Suchaputnych vojskaŭ USU paćvierdziŭ rasijski ŭdar pa palihonie ŭ tyle
-
Jeŭrapiejcy prapanavali svoj płan pieramirja, chočuć, kab ZŠA da jaho dałučylisia. Ale hatovyja «rychtavacca da horšaha»
-
«Vaźmicie šapki-ha*donki, pažadana ciomnaha koleru! Termabializnu z saboju!» Voś što znajšli ŭ telefonie źbitaha rasijskaha lotčyka
Kamientary