2025 — hod topavych kinasikvełaŭ. Praciah jakich filmaŭ varta nie prapuścić
Zdymać praciah papularnych historyj — daŭni łajfchak kinošnikaŭ, jak dać druhoje žyćcio dobramu siužetu. Raskazvajem, na jakija sikveły varta źviarnuć uvahu ŭ 2025 hodzie.
«Misija nievykanalnaja: Apošniaja raspłata» (Mission: Impossible — The Final Reckoning)
U mai pabačym jašče adzin mahčymy finał bujnoj kinahistoryi apošnich dziesiacihodździaŭ. Praŭda, chto viedaje, čaho čakać ad Toma Kruza? Apošnija filmy franšyzy «Misija nievykanalnaja» prasoŭvalisia jak raźvitańnie z hałoŭnym hierojem, ale vyhladaje, što Kruz žadaje praciahnuć franšyzu.
U ciapierašniaj stužcy — praciah i raźviazka historyi, što raspačałasia ŭ minułaj častcy. Supierahient Itan Chant (Tom Kruz) musić źniščyć niebiaśpiečny štučny intelekt i spynić Hebryeła, svajho staroha voraha. Miarkujučy pa trejlery, u filmie buduć składanyja padvodnyja zdymki, pryhožyja bajavyja sceny, pahoni i truki na nievialikim samalocie ŭ pavietry — usio jak my lubim, zaharnicie!
«Baleryna» (Ballerina)
A voś hetaja červieńskaja stužka — nie sikveł u pramym sensie, a chutčej adhalinavańnie ad suśvietu Džona Uika, taho samaha kilera ŭ vykanańni Kijanu Ryŭza, jaki nazyvaŭ siabie «dziciom Biełarusi». Kijanu taksama źjavicca ŭ filmie, ale hałoŭnaja ŭvaha ciapier na inšaj hieraini.
Zorka prajekta — baleryna Jeva Makara (Ana de Armas). Jana prachodzić padrychtoŭku ŭ tradycyjach sindykata najomnych zabojcaŭ «Ruska Roma» i, apantanaja žadańniem pomsty, vypraŭlajecca pa śladach zabojcaŭ jaje baćki.
«M3HAN 2.0» (M3GAN 2.0)
Kali minułyja stužki nie zadavolać vašu prahu da ekšnu, dajcie šans hetamu červieńskamu choraru. U 2023-m vyjšła pieršaja stužka sieryi, «M3HAN» — historyja pra adnajmiennuju lalku-androida, jakaja raptam pačynaje zabivać usich, kaho ličyć pahrozaj dla svaich haspadaroŭ.
Hetaja historyja šmat čamu navučyła Džesi, stvaralnicu lalki. Ciapier žančyna ličyć, što štučny intelekt treba rehulavać, voś tolki technałohija, stvoranaja joj, traplaje ŭ drennyja ruki. Kab pieramahčy novaha androida-zabojcu, Džesi davodzicca ŭdaskanalić M3HAN i naładzić jaje na baraćbu sa svaim anałaham.
«Śviet jurskaha pieryjadu: Adradžeńnie» (Jurassic World Rebirth)
U lipieni vychodzić ažno siomaja častka franšyzy «Park jurskaha pieryjadu». Hałoŭnaja rola — u Skarlet Jochansan.
Kamanda, u jakoj udzielničaje hierainia Jochansan, vypraŭlajecca ŭ trapičny rehijon, bo ŭ suśviecie filma tam jašče zastalisia žyvyja dynazaŭry. Hieroi musiać dabyć DNK troch vialikich dynazaŭraŭ, kab zrabić leki, jakija vyratujuć čałaviečyja žyćci.
«Fantastyčnaja čaćviorka: Pieršyja kroki» (The Fantastic Four: First Steps)
Marvel viartaje na ekrany «Fantastyčnuju čaćviorku», adnu z najpapularniejšych kamandaŭ za ŭsiu historyju komiksaŭ. Buduć bujnyja zorki: naprykład, lidara kamandy, Mistera Fantastyk, hraje Piedra Paskal z «Apošnija z nas» i «Hładyjatara 2», a ŭ roli Sjuzan Štorm čakajem Vanesu Kirbi, zorku franšyzy «Misija nievykanalnaja» i Žazefinu z «Napaleona» (2023).
Što da siužetu, to nam pakažuć fantastyčnuju budučyniu, dzie kamanda supierhierojaŭ vyratoŭvaje płanietu ad kaśmičnych monstraŭ Hałaktusa i Srebnaha siorfiera. Film zajaŭleny jak pierazapusk sieryi, tak što jaho zrobiać zrazumiełym i dla tych, chto nie znajomy z franšyzaj.
«Złaja: Nazaŭždy» (Wicked: For Good)
U kancy 2025-ha zapłanavany sikveł filma «Złaja» — chitovaha miuzikła, što vyjšaŭ niekalki miesiacaŭ tamu i atrymaŭ niekalki naminacyj na «Oskar». U novaje kino viarnulisia zorki «Złoj», epatažnaja brytanka Sintyja Eryva i pop-śpiavačka Aryjana Hrande.
Jak i ŭ minułym filmie, dziejańnie zasnavanaje na siužecie knihi «Dziŭny čaraŭnik z krainy Oz» — u postsavieckich krainach bolš viedajuć jaje pierakaz pad nazvaj «Čaraŭnik smarahdavaha horada». Nam abiacajuć historyju staleńnia dźviuch viadźmarak z krainy Oz, Elfaby i Hlindy, a taksama raskaz pra ich baraćbu z tyranijaj Čaraŭnika. Žanočaja moc!
«Źvierapolis 2» (Zootopia 2)
Hetaha sikveła amatary animacyi čakali ažno z 2016 hoda, kali vyjšła pieršaja častka franšyzy — «Źvierapolis». U 2017-m toj multfilm pra miehapolis, nasieleny žyviołami, adchapiŭ «Oskar» za najlepšy animacyjny poŭnamietražny film, tak što i ad novaha možna čakać fajnaj jakaści.
U sioletniaj stužcy animacyja atrymajecca z prysmakam detektyvu. Čakajem novuju hierainiu — hadziuku, a taksama viartańnie Šakiry — na žal, tolki ŭ farmacie ahučki, jak i ŭ minułym multfilmie.
«Avatar: Połymia i popieł» (Avatar: Fire and Ash)
Na śniežań zapłanavanaja premjera treciaha «Avatara», i heta ciažkaja artyleryja ŭ śviecie sikvełaŭ. Kino maje salidny biudžet 250 miljonaŭ dalaraŭ, za režysuru znoŭ adkazvaje sam Džejms Kemieran, a ŭ kadr viartajucca zorki minułych «Avataraŭ» — Sem Uortynhtan, Zoi Sałdana, Kiejt Uinślet i Sihurni Uivier.
Hetaja franšyza raskazvaje pra spadarožnik Pandoru, dzie razam žyvuć čałaviečyja kałanisty i rasa karennych žycharoŭ Pandory. U centry ŭvahi — Džejk Sali, kałanist, jaki ŭ svoj čas prylacieŭ ź Ziamli. Franšyza viadomaja svaimi hałavakružnymi śpiecefiektami — jość usie pryčyny dumać, što i ŭ novym «Avatary» jany buduć na ŭzroŭni.
«Viartańnie žyvych mierćviakoŭ» (Return of the Living Dead)
Sikveł «Bitłdžusa», jaki vyjšaŭ vosieńniu 2024-ha, — nie adziny chorar z 80-ch, jakomu dali druhoje dychańnie. Naprykancy 2025-ha čakajem «Viartańnie žyvych mierćviakoŭ», pierazahruzku cełaj sieryi kamiedyjnych filmaŭ žachaŭ, jakaja raspačałasia ŭ 1968-m ź niezaležnaha chorara «Noč žyvych mierćviakoŭ».
Toj kłasičny film raskazvaje pra siem amierykancaŭ, na jakich napali ažyłyja niabožčyki. Niadaŭna vyjšaŭ tyzier novaj stužki. Miarkujučy pa im, dziejańnie budzie adbyvacca zimoj 1985-ha, u kaladny čas — bo ŭ tyziery niabožčyk ciahnie kaladnuju jalinku.
«Naša Niva» — bastyjon biełaruščyny
PADTRYMAĆ
Kamientary