Еўрапейскі Саюз прыпыніў некаторыя сектаральныя санкцыі супраць Сірыі. У пастанове Рады ЕС сказана, што гэта зроблена для паскарэння аднаўлення эканомікі краіны і падтрымкі палітычных рэформаў пасля падзення рэжыму Башара Асада.
У прыватнасці, будзе спынена дзеянне абмежавальных мер супраць энергетычнага і транспартнага сектараў краіны, а таксама некалькіх банкаў і авіякампаніі Syrian Arab Airlines (сродкі гэтых кампаній раней былі замарожаныя).
Пры гэтым шэраг санкцый захоўваюцца — -у тым ліку абмежавальныя меры, звязаныя з вытворчасцю хімічнай зброі, гандлем зброяй і таварамі падвойнага прызначэння. Пад забаронай таксама застаецца праграмнае забеспячэнне для сачэння.
У пачатку студзеня ЗША таксама знялі шэраг санкцый у дачыненні да Сірыі, каб зрабіць магчымымі пастаўкі гуманітарнай дапамогі ў краіну.
Санкцыі ЕС і ЗША былі ўведзеныя ў часы рэжыму Башара Асада, супраць якога вылучаліся абвінавачванні ў масавых забойствах палітычных апанентаў і іншых грубых парушэннях правоў чалавека.
Новыя ўлады Сірыі на чале з былым лідарам паўстанцаў Ахмедам Аль-Шараа абяцаюць пабудаваць дзяржаву, дзе будуць забяьпечаныя правы ўсіх груп, у тым ліку рэлігійных меншасцяў і жанчын.
ЕС адзначыў, што будзе сачыць за сітуацыяй у краіне, каб гарантаваць, што прыпыненне санкцый сапраўды дарэчнае. Кая Калас, галоўная дыпламатка ЕС, падкрэсліла, што «калі ўсё пойдзе не так, як трэба, то мы таксама гатовыя вярнуць санкцыі назад».
Сын Асада расказаў пра падзеі напярэдадні ўцёкаў яго бацькі з Сірыі
У Сірыі калону расійскіх вайскоўцаў не пусцілі на базу ў Тартусе
Замест Расіі вайсковыя базы ў Сірыі можа размясціць Турцыя
Лідар групоўкі ХТШ Ахмед аль-Шараа абвешчаны часовым прэзідэнтам Сірыі
Новыя ўлады Сірыі пагадзіліся аднавіць адносіны з Расіяй. Але толькі пасля прызнання памылак і выплаты кампенсацыі
Каментары