Экс-кандыдат у прэзідэнты, былы кіраўнік грамадскага аб’яднання «Гавары праўду» Андрэй Дзмітрыеў актывізаваў свой ютуб-канал, дзе размясціў чатыры відэа.
На канале Андрэй Дзмітрыеў разважае:
«Бачу Беларусь краінай для кожнага, дзе паважаюць грамадзян, без дыктатараў, ідэолагаў і алігархаў, з моцным самакіраваннем, самастойнай эканомікай і роўнасцю ўсіх перад законам. Лічу, што дзяржава павінна падтрымліваць сваіх грамадзян».
Андрэй Дзмітрыеў прапануе стратэгію малых спраў — паступовых змен праз актыўны ўдзел людзей у жыцці сваіх супольнасцей. Ён даводзіць, што нават невялікія ініцыятывы — устаноўка пандуса, сумесныя мерапрыемствы з суседзямі, добраўпарадкаванне двара — у сукупнасці мяняюць свет.
«Калі глядзіш на ўсё, што адбываецца сёння вакол, увогуле натуральным з'яўляецца жаданне проста заплюшчыць вочы і нічога гэтага не бачыць. Сказаць сабе: ну, я ніяк на гэта паўплываць не магу, на рашэнні вялікіх людзей, сусветных лідараў», — заўважае палітык.
«Стратэгія малых спраў, яна якраз пра тое, каб падзяліць тое, на што мы не ўплываем, і тое, на што мы павінны ўплываць, таму што гэта наша жыццё», — лічыць палітык.
Дзмітрыеў падзяліўся, што яму дапамагло прайсці праз складаныя часы, — трэба ўмець заўважаць добрае.
«Вельмі проста сёння з усімі СМІ, з усімі навінамі быць у бясконцай дэпрэсіі. І ад таго, што адбываецца, і ад таго, што на гэта незразумела, як уплываць. (…) Адказам на гэта павінна быць не ўнутраная эміграцыя, (…) а свядомая канцэнтрацыя на тым, а што добрага ёсць у жыцці, і што я магу сёння рабіць, каб гэтага добрага рабілася больш».
«Трэба пачаць дзяліцца Беларуссю, якая вам падабаецца, і цікавіцца ёю. Гэта простыя рэчы, якія можна рабіць у сваіх сацсетках. Можна пацікавіцца, як называлася вуліца, на якой вы сёння жывяце, раней. Можна запытаць у сваіх сваякоў пра гісторыю мясціны, адкуль пайшлі вашы бабулі, дзядулі, ці нейкія цікавыя гісторыі, і падзяліцца гэтым зноў у сацсетках. Абавязкова выкладваць відэа і фота з тых вандровак, экскурсій па Беларусі, якія ёсць. (…)
Важна нам дзяліцца паміж сабою Беларуссю. І тады яе будзе больш», — лічыць Дзмітрыеў і выказвае ўпэўненасць, што такім чынам «мы будзем усё лепш і лепш адказваць сабе на пытанне, хто мы такія беларусы і што для нас сёння Беларусь».
Цяпер чытаюць
Дачка міліцэйскага начальніка з Гродна расказала, як сядзіць у турме ў Непале прысуджаныя 15 гадоў2
Каментары