Стэнаграма рэзкай размовы Трампа, Вэнса і Зяленскага

Пачалося з пытання журналіста пра тое, ці лічыць Трамп, што ён занадта аб'яднаўся з Пуціным.

Трамп: Калі б я не аб'яднаўся з абодвума з іх, у нас не было б здзелкі. Ён [Зяленскі] хоча, каб я казаў кепскія рэчы пра Пуціна, а потым тэлефанаваў яму і так: прывітанне, Уладзімір, як там у нас здзелка? Так гэта не працуе. Я не аб'яднаўся з Пуціным, я не аб'яднаўся ні з кім, я аб'яднаўся з ЗША. Вы бачыце, колькі нянавісці ў яго [Зяленскага] да Пуціна, так вельмі цяжка заключаць здзелкі. І я разумею гэта, але і другі бок таксама яго не вельмі любіць. Так што гэта не пытанне, з кім я аб'яднаўся. Вы хочаце, каб я быў жорсткім — я магу быць самым жорсткім чалавекам у свеце, але так у нас не будзе здзелкі.

Умяшаўся Вэнс.

Вэнс: На працягу чатырох гадоў у нас быў прэзідэнт, які дрэнна казаў пра Пуціна, а потым Пуцін уварваўся ва Украіну і разбурыў значную частку краіны. Шлях да міру і дабрабыту, магчыма, ляжыць у дыпламатыі. Мы спрабавалі шлях Джо Байдэна — біць сябе ў грудзі і ўяўляць, што словы прэзідэнта ЗША значаць больш, чым яго дзеянні. Што робіць Амерыку добрай краінай — гэта тое, што яна ўдзельнічае ў дыпламатыі. Гэта тое, што робіць Трамп.

Зяленскі: Магу я вас спытаць?

Вэнс: Канешне.

Зяленскі: Ён акупаваў вялікія часткі Украіны, усход, Крым — у 2014-м. На працягу многіх гадоў, не толькі Байдэна, але і Абамы, Трампа, Байдэна, цяпер зноў Трампа, і дай бог, каб Трамп зараз спыніў яго. Але ў 2014-м ніхто яго не спыніў. Ён акупаваў, забіў.

Трамп: 2015-ты?

Зяленскі: 2014-ты.

Трамп: Мяне тады не было.

Зяленскі: Так. Але з 2014 да 2022 была тая ж сітуацыя, людзі паміралі на лініі сутыкнення. Ніхто не спыніў яго. У нас былі размовы з ім. Я ўдваіх з ім гаварыў. Мы падпісалі, калі я стаў прэзідэнтам, здзелку ў 2019-м. Там быў Макрон і Меркель — мы падпісалі прыпыненне агню. Усе казалі мне, што ён ніколі не пойдзе. І ён парушыў прыпыненне агню. Забіў людзей. Не мяняў палонных. Мы дамовіліся аб гэтым, але ён гэтага не зрабіў. Аб якой дыпламатыі вы кажаце, Джэй Дзі?

Вэнс: Я кажу аб дыпламатыі, якая спыніць разбурэнне вашай краіны.

Зяленскі: Так, але калі вы яго не спыніце…

Вэнс: Спадар прэзідэнт, пры ўсёй павазе, я думаю, гэта непавага з вашага боку прыехаць у Белы дом і спрачацца аб гэтым перад амерыканскімі медыя. Цяпер вы прымусова мабілізуеце прызыўнікоў, таму што ў вас праблемы з жывой сілай. Вы павінны быць удзячныя прэзідэнту за тое, што ён спрабуе пакласці гэтаму канец.

Зяленскі: Вы былі ва Украіне, каб казаць аб нашых праблемах? Схадзіце хоць бы раз.

Вэнс: Я бачыў гісторыі. І я ведаю, што адбываецца. Людзі прыязджаюць да вас на прапаганда-тур. Вы не згодныя, што ў вас праблемы з мабілізацыяй? Вы думаеце, што гэта павага прыехаць у офіс прэзідэнта ЗША і атакаваць адміністрацыю, якая спрабуе перашкодзіць разбурэнню вашай краіны?

Зяленскі: Падчас вайны ва ўсіх ёсць праблемы. Нават у вас, але ў вас ёсць выдатны акіян, таму вы не адчуваеце. Але вы адчуеце гэта ў будучыні. Дай бог, каб у вас не было вайны.

Трамп: Вы гэтага не ведаеце. Не ведаеце. Не кажыце нам, што мы адчуем. Мы хочам вырашыць праблемы. Вы не ў тым становішчы, каб дыктаваць нам.

Зяленскі: Я не кажу вам, я адказваю на пытанне.

Трамп: Вы не ў становішчы, каб дыктаваць нам, што мы адчуем. Мы будзем адчуваць сябе вельмі добра і вельмі моцна.

Зяленскі: Вы адчуеце ўплыў.

Трамп: Вы не ў вельмі добрым становішчы. Вы дазволілі сабе быць у вельмі дрэнным становішчы.

Зяленскі: З самага пачатку вайны… З самага пачатку вайны…

Трамп: Вы не ў тым становішчы. У вас няма карт на руках. З намі ў вас будуць карты.

Зяленскі: Я не гуляю ў карты. Я вельмі сур'ёзны.

Трамп: Вы гуляеце ў карты. Вы гуляеце жыццямі мільёнаў людзей.

Зяленскі: Я прэзідэнт краіны падчас вайны.

Трамп: Вы гуляеце з Трэцяй сусветнай.

Зяленскі: Аб чым вы кажаце?

Трамп: І тое, што вы робіце — не павага да краіны. Да гэтай краіны.

Зяленскі: У мяне вялікая павага да вашай краіны.

Вэнс: Сказалі вы хоць раз дзякуй за ўвесь гэты час?

Зяленскі: Так, і сёння казаў.

Вэнс: Вы паехалі ў Пенсільванію і ўдзельнічалі ў кампаніі нашых апанентаў. Скажыце некалькі слоў удзячнасці Амерыцы і прэзідэнту, які хоча выратаваць вашу краіну.

Зяленскі: Калі ласка, вы думаеце, што калі вы будзеце казаць павышаным голасам пра вайну…

Трамп: Ён не кажа павышаным голасам. У вашай краіне вялікія праблемы.

Зяленскі: Магу я задаць пытанне?

Трамп: Пачакайце. Не-не. Вы і так накажаце. У вашай краіне вялікія праблемы.

Зяленскі: Я ведаю.

Трамп: Вы не выберацеся з гэтага. У вас ёсць добры шанс нармальна выйсці дзякуючы нам.

Зяленскі: Спадар прэзідэнт, мы ў нашай краіне, мы моцна стаім. З самага пачатку вайны мы былі адны, і мы ўдзячныя. Я казаў дзякуй у гэтым кабінеце, і не толькі ў гэтым кабінеце.

Трамп: Вы не былі адны. Вы не былі адны. Мы далі вам, гэтаму дурному прэзідэнту [Байдэну] $350 мільярдаў…

Зяленскі: Вы галасавалі за гэтага прэзідэнта…

Трамп: Мы далі вам узбраенне. І вы змагаліся смела, але вы выкарыстоўвалі наша ўзбраенне.

Зяленскі: Аб чым мы гаворым? Вы запрасілі мяне…

Трамп: Калі б не наша ўзбраенне, гэтая вайна б закончылася за два тыдні.

Зяленскі: Я чуў гэта ад Пуціна, за тры дні, за два тыдні…

Трамп: Магчыма, нават менш. Будзе вельмі цяжка заключыць здзелкі такім чынам.

Вэнс: Скажыце дзякуй.

Зяленскі: Я шмат разоў казаў дзякуй амерыканскаму народу.

Вэнс: Прыняты рознагалоссі. І давайце абмяркуем гэтыя рознагалоссі, замест таго, каб біцца перад амерыканскімі медыя, калі вы не маеце рацыю. Мы ведаем, што вы не маеце рацыю.

Трамп: Але я думаю, вельмі добра, каб амерыканцы пабачылі, што адбываецца. Вы павінны быць удзячныя.

Зяленскі: Я ўдзячны.

Трамп: У вас няма карт. У вас людзі паміраюць, у вас заканчваюцца салдаты.

Зяленскі: Я ведаю, калі ласка, спадар прэзідэнт.

Трамп: А цяпер вы кажаце (крывіць яго): я не хачу спынення агню, я не хачу спынення агню. Калі ў вас будзе спыненне агню, вы павінны гэта прыняць, каб кулі спыніліся, а вашы людзі перасталі паміраць.

Зяленскі: Канешне, мы хочам спыніць вайну.

Трамп: Але вы кажаце, што не хочаце спынення агню.

Зяленскі: Але я казаў вам, нам патрэбны гарантыі.

Трамп: Бо спыненне агню будзе хутчэй, чым дамовы.

Зяленскі: Спытайцеся, што нашы людзі думаюць аб спыненні агню?

Трамп: Так не было са мной. Так было з тым хлопцам па імені Байдэн, які не занадта разумны чалавек.

Зяленскі: Але гэта быў ваш прэзідэнт.

Трамп: Так было з Абамай, хто даў вам коўдры, а я даў вам «Джавеліны», каб вы выбілі ўсе гэтыя танкі. Абама даў вам коўдры. Вы павінны быць больш удзячныя. Таму што я павінен сказаць вам: у вас няма карт. З намі ў вас ёсць карты. Але без нас у вас ніякіх карт. Так будзе вельмі цяжка заключыць здзелку. Таму што стаўленне павінна змяніцца.

Журналіст: Але што калі Расія парушыць спыненне агню? Я разумею, што гэта напружаная дыскусія…

Трамп: А што калі, а што калі. А што калі бомба ўпадзе вам на галаву зараз? Што калі яны яе парушаць… Я не ведаю, яны б парушылі яе пры Байдэне, бо Байдэна яны не паважалі, яны не паважалі Абаму. Яны паважалі мяне. Пуцін прайшоў праз шмат з мной. Вы чулі пра справу Хантэра Байдэна? Там быў гучны дэмакратычны скам. І ён прайшоў праз гэта. Мы прайшлі праз шмат і гэта не закончыцца вайной. Усё гэта было з ванны Хантэра Байдэна, з яго спальні. Гэта было брыдка. А потым яны кажуць, што, о, той ноўтбук быў падроблены Расіяй. Усё гэта махлярства. Усё, што я магу сказаць: ён мог парушыць здзелкі з Абамай, з Бушам. Ён мог парушыць здзелкі з Байдэнам. Можа быць, я не ведаю. Але ён не парушыў здзелкі са мной. Ён [Пуцін] хоча здзелку, я не ведаю, ці заключыць ён. Але праблема ў тым, што я даў вам [Зяленскаму] магчымасць быць крутым хлопцам. Але малаверагодна, што вы будзеце крутым хлопцам без ЗША. Вашы людзі вельмі храбрыя. Але мы або робім здзелку, або вы па-за гульнёй. А калі вы па-за гульнёй — я думаю, вы адчуеце, гэта будзе не вельмі прыемна. Але ў вас няма карт».

• 4
• 3
• 0
• 16
• 0
• 3
• 3
• 1